வரதட்சணைக்கு பெரிதும் காரணம் பெண்களே-3

நடுவர் அவர்களே! 
ஒரு பெண்ணைக் கட்டிக் கொடுத்தால் அவளுக்கு புகுந்த வீட்டில் ஏற்படும் கொடுமைகளில் ஒன்று நாத்தனார் கொடுமை. இந்த நாசம் பிடித்த நாத்தனார்கள் சுனாமிகளைப் போல் குடும்பத்தை நாசம் செய்து கொண்டிருக்கிறார்கள்.

•  இந்த மாமியார் நாத்தனார் என்ற பெண்களின் கோரப்பிடியில் சிக்கி சீரழியும் பெண்கள் எத்தனை? 
• இவர்களால் ஸ்டவ்கள் வெடித்து பரிதாபமாய் பலியான பெண்கள் எத்தனை? 
• தீக்குளித்த பெண்கள் எத்தனை? 
• விஷம் குடித்த பெண்கள் எத்தனை? 
• தற்கொலை செய்துகொண்ட பெண்கள் எத்தனை? 

இப்படி ஏராளமான மாபாதகங்களை செய்துகொண்டிருப்பவர்கள் இந்த பெண்கள்தான்.

ஒரு வாலிபன் வரதட்சணை வேண்டாம் என்று மறுத்தாலும் அவனைப் பெற்ற தாயும் சகோதரியும் சும்மா விடுவதில்லை. 

இதுல இரட்டை சீர்வரிசைன்னு ஒன்னு இருக்குங்க.. இதை எவதான் கண்டுபிடிச்சாளோ தெரியல.. இரட்டை சீர்வரிசைன்னா என்ன தெரியுமா? 

• அண்டாவானா ரெண்டு; குண்டாவானா ரெண்டு.
• சட்டியானா ரெண்டு பெட்டியானா ரெண்டு. 

இப்படி அண்டா குண்டா எல்லாமே ரெண்டு கொடுத்தா மட்டும் போதாது.அதுக்குள்ள 101 லட்டு வக்காட்டி குத்தம்; குழல் பணியாரம் வக்காட்டி குத்தம்; தேங்காயில ஒன்னு குறைஞ்சால குத்தம். இப்படி சின்ன சின்ன விஷயத்துக்கெல்லாம் குத்தம் கண்டுபிடிச்சு மார்க்கத்திலில்லாத மடமைகளை கடமைகளாக்கி வைத்திருப்பவர்கள் இந்த பெண்கள்தான். 

ஆகவே வரதட்சணை வாங்குவது பெண்களின் மடமை!

அதை வாங்காமலிருப்பது ஆண்களின் கடமை!!

எனவே வாட்டி வதைக்கும் வரதட்சணைக் கொடுமைக்கு பெரிதும் காரணம் பெண்களே! பெண்களே!! என்று உறுதிபடக் கூறி அமர்கிறேன்.

வரதட்சணைக்கு பெரிதும் காரணம் பெண்களே-2

தனிக்காட்டு ராஜாவாக அமர்ந்திருக்கும் சிங்கமே!
மரியாதைக்குரிய நடுவர் அவர்களே!
வரதட்சணை வன் கொடுமைக்கு பெண்கள்தான் காரணம் என்று அடுக்கடுக்கான ஆதாரங்களை எடுத்து சொன்னதற்குப் பிறகும் இந்த வருங்காலக் கிழவிகளுக்கு இன்னுமா புரியவில்லை?
வரதட்சணைக்கு மாத்திரமல்ல.. நடுவர் அவர்களே! உலகில் நடக்கும் அத்தனை தீமைகளுக்கும் இந்த பெண்கள் தான் காரணம். ஆவதும் பெண்ணாலே அழிவதும் பெண்ணாலே என்பார்கள் பெண்களால் ஆகின்றதோ இல்லையோ அழிவுதான் அதிகம் நடந்துகொண்டே இருக்கிறது.

ஆதிமனிதனாம் ஆதம் (அலை) அவர்களுக்கு பிறந்த காபீல் என்பவர் ஹாபீலைக் கொலை செய்தார். உலகில் நடந்த முதல் கொலை யாரால் நடந்தது தெரியுமா? இக்லிமா என்ற பெண்ணால்தான். அதுமட்டுமல்ல பெண்கள் சிறந்தவர்கள் பெண்கள் உயர்ந்தவர்கள் என்று பேசுகிறாங்க பெருசா..
அன்றைய பெண்களின் நிலை என்ன? இன்றைய பெண்களின் நிலை என்ன? அன்று தாய்மார்கள் குழந்தையை தொட்டிலில் போட்டு தாலாட்டும்போது இஸ்லாமிய பாடல்களை பாடினார்கள்.

கண்ணுறங்கு கண்மணியே! கருவில் வந்த கற்கண்டே !!

ஆண்டவன் தந்த அற்புதமே !

அல்லாஹு அக்பர் என்று உறங்கு! 

நீ அண்ணல் நபி ஆசியோடு உறங்கு 

ஆனால் இன்னைக்குள்ள தாய்மாருக்கு தாலாட்டுப் பாடவே தெரியல.. அப்படியே பாடினாலும் என்ன தெரியுமா பாடுறாங்க..

''ஒய் திஸ் கொலைவெறி கொலைவெறி கொலைவெறி டி
ஒய் திஸ் கொலைவெறி கொலைவெறி கொலைவெறி டி ''
(இந்த இடத்தில் வேறு ஏதாவது பாடலை சேர்த்துக் கொண்டாலும் சரியே)

இந்தமாதிரி பாலாய்ப்போன சினிமாப் பாடலைப் பாடி பாடி குழந்தைகளைக் கெடுத்து சமுதாயத்தையும் கெடுத்துக் கொண்டிருக்கிறார்கள் இந்த பெண்கள்.

நடுவர் அவர்களே! நோகாம நொங்கு திங்குறதுன்னா என்ன தெரியுமா? சொல்றேன் கேளுங்க.. தன் பையனுக்கு மாத்திரம் நகையும் நட்டும் காசு பணத்தையும் அதிகமாக வாங்கி மருமகள் கொண்டு வந்ததையெல்லாம் தன் மகளுக்கு போட்டு கல்யாணம் பண்ணி வைக்கிற லேட்டஸ்டு கலாச்சாரம்தான் நோகாம நொங்கு திங்குறது.

ஆதியிலே வந்தவன் வீதியிலே போனானாம்.. நேத்து வந்தவன் நெய்யூத்தி தின்னானாம். அந்த கதையாவுல இருக்கு?
ஒரு பொம்பள தன் மகனுக்கு பொண்ணு பார்க்க போயி 150 பவுன் நகை போடனும்னு கேட்டாளாம். ''அடி ஆத்தி.. அப்படியென்ன ஒம் மகன் லாடு வூட்டு லபக்கு தாஸா.. இல்ல லாடு வூட்டு கொலாப்புட்டா? என்ன உத்தியோகம் பார்க்கிறான் என்று கேட்டால், ''எம்புள்ள S.I யா இருக்கான் அப்படின்னாங்க '' ''அது என்ன S.I அப்படின்னு கேட்டால், ''சும்மா இருக்கிறதுதான்'' அப்படின்னு சொன்னாங்க.
''சரி 150 பவுன் போடுகிறோம்.. நீங்க என்ன போடுகிறீர்கள்.? என்று கேட்டால் ''நாங்க அதை வாங்கி எடை போடுவோம்; குறைஞ்சா கல்யாணத்துக்கு தடை போடுவோம்'' அப்படின்னாங்க.
இப்படிப்பட்ட பெண் மாமியாரின் அவலட்சணங்களால்தான் வரதட்சணைக் கொடுமை காட்டுத்தீயாய் சமூகத்தில் பரவிக் கொண்டிருக்கிறது.

அருமையானவர்களே!

• ஏங்கித் தவிக்கும் ஏழைக் குமர்களின் ஏக்கப் பெருமூச்சுகளைத் துடைத்திட 
• வாடி வதங்கும் வண்ண மலர்களின் வருத்தங்களைக் கலைந்திட
• கண்ணீர்க் கடலில் தினம் தினம் கலங்கிக் கிடக்கும் கன்னியரின் கவலைப் போக்கிட 
• வாழ வழியின்றி விழி பிதுங்கி நிற்கும் பெண் குமர்கள் கரை சேர்ந்திட
• வேதனைத் தீயில் வெம்பித் துடிக்கும் பெண் இனத்தின் துயர் தீர்ந்திட
• கல்யாணச் சந்தையில் விலைபோக முடியாமல் விரக்தியின் விளிம்பில் நடைப் பிணமாய் வாழும் எண்ணற்ற அன்பு மலர்களை, அழகுப் பதுமைகளை வாழவைத்திட 

ஆண்கள் மாத்திரமல்ல பெண்களும் திருந்தவேண்டும் குறிப்பாக மாமியார் என்ற அல்லி ராணிகள் கெட்ட கள்ளி ராணிகள் கொள்ளை ராணிகள் திருந்தினால் மட்டுமே வரதட்சணை சனியனை ஒழிக்க முடியும். ஆகவே வாட்டி வதைக்கும் வரதட்சணைக் கொடுமைக்கு பெரிதும் காரணம் பெண்களே பெண்களே என்று கூறி என்னுரையை நிறைவு செய்கிறேன்.


சகோதரர்களே! இந்த பதிவைப் பற்றி உங்கள் கருத்தை இங்கே இடலாமே! 

வரதட்சணைக்கு பெரிதும் காரணம் ஆண்களே -2

வாட்டி வதைக்கும் வரதட்சணைக்கு பெரிதும் காரணம் ஆண்களே என்று எங்கள் அணியினர் ஆதாரத்துடன் அடித்துப் பேசியும் இந்த மண்டையிலே மசாலா இல்லாத மரமண்டைகளுக்கு உரைக்கவில்லைனா என்ன செய்வது?
பத்துமாசம் சுமந்து பெற்றெடுத்த தாய்மார்களை எதிர்த்துப் பேச வந்திருக்கும் நன்றி மறந்தவர்களே! நன்றி கெட்டவர்களே!

நடுவர் அவர்களே! இவங்கள பார்த்தால் இருட்டுல புடிச்சு வச்ச கொழுக்கட்டை மாதிரி இருந்துக்கிட்டு எங்கள எதிர்த்து பேச வந்துட்டாக

الجنة تحت أقدام الأمهات                                                                                                                            

  

தாயின் காலடியில் சேயின் சொர்க்கம் என்று பெண்ணினத்தின் பெருமையை உயர்த்திப் பேசிய பெருமானாரின் மணி மொழியை மறந்துவிட்டீர்களா

திருமணம் சொர்க்கத்தில்; நிச்சயிக்கப்படுது என்பார்கள்.
''ஏங்க.. சொர்க்கத்திலயா நிச்சயிக்கப்படுது? ரொக்கத்திலும் சொக்கத் தங்கத்திலும் அல்லவா நிச்சயிக்கப்படுது?
இன்று நடுத்தரமான குடும்பத்துல ஒரு பெண்ணை கல்யாணம் முடிச்சுக் கொடுக்கணும்னா என்னவெல்லாம் கொடுக்கணும்னு தெரியுங்களா?

• சொத்த மாப்பிள்ளையானாலும் சொக்கத் தங்கத்துல 25 பவுன் நகை.
• வேலைவெட்டிக்கே போகாமல் ஊர் சுற்றித் திரியும் ஊதாரி மாப்பிள்ளைக்கு 50 ஆயிரம் பணம்
• வாட்ச் வாங்க வக்கில்லாதவனுக்கு கைக்கு ஒரு வாட்ச்
• விரலே இல்லாத விளக்கெண்ணைக்கு இன்ஷியல் போட்ட மோதிரம்.
• நிச்சயதார்த்தம் அன்னைக்கு 100 பேருக்கு ஓசி பிரியாணி.
• கல்யாணத்தன்னிக்கு சுத்தமான கிடாக்கறியிலே 500 பேருக்கு தண்டச்சோறு
• சுத்த பேக்கு மாப்பிள்ளயானாலும் தேக்கு மரத்துல கட்டிலும் பீரோவும் கொடுக்கணுங்க
• பண்டாரங்களுக்கு பாத்திரப் பண்டங்கள் வேற.
• கல்யாணம் முடிஞ்சு குழந்தை பெறந்துச்சுன்னா குழந்தைக்கு காதுக்கு கழுத்துக்கு இடுப்புக்கு தங்கத்திலோ வெள்ளியிலோ போடனுங்க
• சாதாரண நொண்டி மாப்பிள்ளைக்கே வண்டி வண்டியா கொடுக்கனும்னா படிச்ச பண்டார மாப்பிள்ளைக்கு எவ்வளவு கொடுக்கணும்? 

நடுவர் அவர்களே!

 لقد كان لكم في رسول الله أسوة حسنة

நிச்சயமாக அல்லாஹ்வின் தூதரிடத்தில் உங்களுக்கு ஒரு அழகிய முன்மாதிரி இருக்கிறது என்று அல்லாஹ் கூறுகிறான்
அப்படிப்பட்ட பெருமானார் திருமணம் முடித்திருக்கிறார்கள். எந்த மனைவியிடமாவது வரதட்சணை வாங்கியிருக்கிறார்களா? சீர் வரிசையாவது வாங்கியிருக்கிறார்களா? இல்லையே!

மார்க்கத்தின் மான்புகளையெல்லாம் காற்றில் பறக்கவிட்டு இந்த ஆண்கள் செய்யும் அக்கிரமங்களால் வாடி வதங்கும் பெண்கள் எத்தனை? கதிகலங்கிக் கிடக்கும் கன்னியர் எத்தனை? மனம் வெதும்பி அழுகின்ற மங்கையர் எத்தனை? தனக்கு ஒரு வரன் கிடைக்காதா என்று ஏங்கித் தவிக்கும் ஏழைக் குமர்கள் எத்தனை?
ஏ۔۔ வக்கற்ற வாலிபக் கூட்டமே! நீங்கள் வரதட்சணை வாங்கி வயிறு வளர்ப்பதில் சங்கடங்கள் சோகங்கள் உங்களுக்கு தெரியுமா? புனிதமிக்க இஸ்லாத்தில் பிறந்து இஸ்லாத்தில் வளர்ந்து வயதுக்கு வந்த ஏழைக்குமர்களை திருமணம் செய்ய முஸ்லிம் இளைஞர்கள் வரதட்சணை கேட்பதால் வேறு வழியில்லாமல் மாற்று மத இளைஞர்கள் திருமணம் செய்துகொண்டிருக்கிறார்கள். இஸ்லாத்தைத் தூக்கிப் பிடித்திருக்கிறேன் என கொக்கரிக்கு இளைஞர்களே! கண்ணியத்திற்குறிய பள்ளிவாசல் நிர்வாகிகளே! மார்க்கத்திற்கு வழிகாட்டிக்கொண்டிருக்கும் உலமாப் பெருமக்களே!! இதற்கெல்லாம் தீர்வு காண்பது உங்கள் கடமை அல்லவா? ஆண்களாகிய நீங்கள் பொறுப்புகளை உணராததால்தான் இந்த வரதட்சணைக் கொடுமை அதிகமாகிக் கொண்டிருக்கிறது.
ஆகவே புற்றுநோய் தொற்று நோய் போல பரவிகொண்டிருக்கும் இந்த வரதட்சணைக்கு பெரிதும் காரணம் ஆண்களே ஆண்களே என்று உறுதிபடக் கூறி என் உரைக்குத் திரையிடுகிறேன்.

மஹர் (மணக் கொடை)

மஹர் என்பது திருமணம் முடிக்கும் மணமகன், மணமகளுக்கு வழங்கும் கொடையாகும். அதை வழங்காமல் அவளைத் தொட்டால் மறுமயில் அவன் விபச்சாரியாக அல்லாஹ்வை சந்திப்பான்'' என்று நபிகள் நாயகம் (ஸல்) அவர்கள் கூறியுள்ளார்கள்.

மஹர் வசதிக்கேற்றவாறு வழங்கலாம்.

 1. பணம்

 நபிகள் நாயகம்(ஸல்) அவர்கள் தங்கள் மனைவியருக்கு 12.5 ஊகியா (சுமார் 500 திர்ஹம் அதாவது 6500 ருபாய் வரை) மஹர் வழங்கியதாக அன்னை ஆயிஷா (ரலி) அவர்கள் தெரிவிக்கிறார்கள்:
 (முஸ்லிம்,அபூதாவூது,அஹ்மத்,நஸயீ,இப்னுமாஜா.

 2. நகை (தங்கம், இரும்பு)

 நாயகத் தோழர் அப்துர் ரஹ்மான இப்னு அவ்ஃப்(ரலி) அவர்கள் தங்கத்தில் ஒரு சிறு அளவை தம் மனைவிக்கு மஹராகக் கொடுத்தார்கள்.
 ( புகாரி.)

 ஒரு இரும்பு மோதிரத்தையாவது மணப்பெண்ணுக்கு மஹராகக் கொடுத்து மணமுடியுங்கள் என நபி(ஸல்) அவர்கள் எங்களுக்கு கட்டளையிட்டார்கள்.
 (புகாரி, முஸ்லிம்.)

 3. தோட்டம்

 ஸாபித் இப்னு கைஸ்(ரலி) அவர்களின் மனைவி ஒரு தோட்டத்தையே மஹராகப் பெற்றிருந்தார் (சுருக்கம்)
 ஆதாரம்: புகாரி, நஸயீ.

 4. கல்வி புகட்டல்

 அண்ணல் நபி (ஸல்) அவர்கள் நாயகத் தொழர் ஒருவர் மஹர் கொடுக்க வசதியே இல்லாதபோது அவருக்குத் தெரிந்த குர்ஆனின் சில அத்தியாயங்களை மணப்பெண்ணுக்குக் கற்றுக் கொடுப்பதையே மஹராக நிர்ணயித்தார்கள்.
  ஆதாரம்: புகாரி, முஸ்லிம்.


 5. அடிமைத்தழையிலிருந்து விடுதலை

 ஒரு அடிமையை உரிமைவிட்டு அதையே மஹராக அறிவித்தார்கள் நபியவர்கள்.

 அனஸ் (ரலி) அறிவிக்கிறார்கள்.
 பெருமானார்(ஸல்) அவர்கள் ஸபிய்யா என்னும் பெண் போர்க்கைதியை விடுதலை செய்து அதையே மஹராக அவர்கள் மணந்து கொண்டார்கள்.


 6. இயலாதோருக்கு காலணிகள், பேரீத்தம் பழங்கள்

 இயலாதோருக்கு காலணிகள், பேரீத்தம் பழங்கள், துணிமணிகள் தேவiயான பொருட்கள் போன்றவற்றையும் மஹராக வழங்கலாம் என்பதை நபிமொழிகள் அறிவிக்கின்றன.

 ஒரு பெண்மணிக்கு காலணிகளை வழங்கி திருமணம் செய்ய அனுமதித்துள்ளார்கள்.

 ஆதாரம்: திர்மிதி, அஹ்மத், இப்னுமாஜா.


 7. இஸ்லாத்தை தழுவுதல்

 இஸ்லாத்தை ஏற்றுக் கொள்வதையே மஹராக நிர்ணயித்திருப்பதை இஸ்லாம் வரவேற்கிறது.

 நாயகத்தோழி உம்மு ஸுலைம் (ரலி) அவர்கள், அபூதல்ஹா என்பவர் தம்மை மணம் செய்ய விரும்பியபோது ‘நீர் முஸ்லிமானால் அதுவே எனக்கு மஹராகும் அதைத்தவிர வேறு எதையும் மஹராகக் கேட்க மாட்டேன்’ எனக் கூறினார்கள்.

 ’இஸலாத்தை ஏற்பதையே மஹராக இருந்தது’ என அவரது மகன் அனஸ் (ரலி) அவர்கள் அறிவிக்கிறார்கள்.
 ஆதாரம்: நஸயீ.

 (இஸ்லாத்தை தழுவுவதே தனக்கு மஹராகும் என உலகில் அறிவித்த ஓரே பெண் இவர்தான் என்பது குறிப்பிடத்தக்கது.)

 மஹரின் உரிமை

 பெண்தான் மஹரைக் கேட்க வேண்டும். அந்த உரிமையை இஸ்லாம் அவளுக்கு வழங்கியுள்ளது. மணமகன் மஹ்ரை கொடுக்கக் கடமைப்பட்டிருப்பதால் அவள் கேட்கும் தொகையை அவன் கொடுத்தாக வேண்டும்.
 உம்மு ஸுலைம்(ரலி) அவர்களே மஹரை முடிவு செய்த ஹதீஸ் மூலம் மஹரை தீர்மானிக்கும் உரிமை பெண்களுக்கே உரியது என்;பதை புரிந்து கொள்ளலாம்.

 மஹரின் அளவு
 எதையும் எளிதாகச் செய்ய வேண்டுமென விரும்பும் இஸ்லாம், மஹரையும் குறைவாக இருப்பதே சிறப்பிற்குரியது. அது எளிய மக்களுக்கு ஒரு சுமையாகி விடக்கூடாது என்பதில் எச்சரிக்கையாக இருக்கிறது.
 ’குறைவான மஹரே மிகச் சிறந்தது’ என நபிகள் (ஸல்) அவர்கள் குறிப்பிடுள்ளதாக உக்பத் இப்னு ஆமிர்(ரலி) அறிவிக்கின்றார்கள்.
 ஆதாரம்: அபூதாவூது. ஹாக்கிம்.
 எனினும் அவரவர் வசதிக்கேற்ப கொடுப்பதில் தவறில்லை இருப்பவர் தாராளமாகக் கொடுக்கலாம்.
 இரும்பு மோதிரம் முதல் தங்கப்புதையல் வரை கொடுக்கலாம்.
 ஒரு (கின்தாரை) பொற்குவியலை (மஹராகக்) கொடுத்தாலும் அதிலிருந்து எதையும் எடுக்காதீர்கள் அல்குர்ஆன் 4:20 என்ற வசனத்தின் மூலம் ஒரு பொற்குவியலையும் மஹராக வழங்கலாம் எனத் தெரிந்து கொள்ளலாம்.

                                                         

சகோதரர்களே! இந்த பதிவைப் பற்றி உங்கள் கருத்தை இங்கே இட்டுச் செல்லலாமே!

வரதட்சணைக் கொடுமைக்கு பெரிதும் காரணம் பெண்களே -1

நடுவர் அவர்களே! 

எனக்கு முன்னால் பேசிய சகோதரி கண்டதையெல்லாம் உளறிக் கொட்டிவிட்டு போயிருக்கிறார். முழுப் பூசனிக்காயை சோத்துல மறைக்கிறமாதிரி உண்மையை மறைச்சு பேசியிருக்கிறார். ஆற்றல்மிக்க ஆண் சமுதாயத்தை அவமானத்திப் பேசிச் சென்றிருக்கிறார். நடுவர் அவர்களே! நீங்க ஆணா? பெண்ணா?

சரி அது போகட்டும். அவுங்க பேசும்போது தமிழகத்திலொரு குடும்பம் தற்கொலை செய்துகொண்டதாகவும் அதுக்கெல்லாம் காரணம் ஆண்கள்தான் அப்படின்னு சொன்னானாங்க. நான் கேட்கிறேன் உலகத்துல எங்கேயாவது மாமனார் மருமகன் சண்டையை கேள்விப்பட்டிருக்கீங்களா/? ஆனால் எங்கே பார்த்தாலும் ஒரே மாமியார் மருமகள் சண்டைதான். இதை உங்களால மறுக்கமுடியுமா?

ஓ முக்காடு போட்டு முழிக்கும் முண்டாசுகளே! நல்லா சொல்றேன் கேட்டுக்குங்க. பெண்ணுக்கு பெண்ணே எதிரி என்பதற்கு எண்ணற்ற எடுத்துக்காட்டுகளை என்னாலே காட்டமுடியும்.

மாமியார் என்ற பணப் பேய்கள் ஒரு பெரிய உதாரணம். உங்களுக்கு மட்டும்தான் உண்மைச் சம்பவம் சொல்லத் தெரியுமா? நானும் ஒரு உண்மைச் சம்பவம் சொல்றேன் கேளுங்கம்மா கேளுங்க.

தமிழகத்தில் ஒரு பிரசித்த பெற்ற ஊரில் தன் மகனுக்கு லட்ச ரூபாய் ரொக்கமும் சொக்கத் தங்கம் இருபது பவுனும் கறாராய்ப் பேசி தன் மகனுக்கு ஒரு பெண்ணைப் பார்க்கிறாள் மாப்பிள்ளையின் தாய். 15 பவுன் நகையைப் போட்டுவிட்டு மீதி நகையை பிறகு தருகிறோம் என்று சொன்னதைக் கேட்ட மாமியார் என்ற பெண்பிசாசு ''அப்படியென்றால் இந்த சம்பந்தமே வேண்டாம்'' என்று பேயாட்டம் போடுகின்றாள். எல்லாம் ஒருவழியாக சமாதானம் ஆகி திருமணம் நடக்கிறது. கல்யாணம் முடிந்து சில நாட்கள்தான். மீதி 5 பவுனை எங்கே எங்கே என்று அந்த மணப்பெண்ணை நச்சரித்து கொடுமைப் படுத்துகிறாள் மாமியார். சில மாதங்கள் கழிகிறது. புதுப்பெண்ணும் கர்ப்பிணி ஆகிறாள். பாவம் வயிற்றில் கருவை சுமக்கிறாளே என்று கூட பார்க்காமல் அவளின் தலைமுடியைப் பிடித்திழுத்து மீதி நகையை தரவக்கில்லாத உனக்கு குழந்தை ஒரு கேடா'' என சொல்லி வயிற்றில் எட்டி உதைக்கிறாள் கல்னெஞ்சம் படைத்த அந்த மாமியார். கர்ப்பிணியான அந்த மருமகள் அந்த உதையைத் தாங்கமுடியாமல் மயங்கி கீழே விழுகிறாள். அப்படியும் ஆத்திரம் அடங்காமல் அந்த ராட்சசி மாமியார் மயங்கிக் கிடக்கும் மருமகளை அடித்து உதைத்து இரண்டு கால்களையும் பிடித்து தரதரவென இழுத்து சமையலறைக்குள் கொண்டுபோய் மண்ணெண்ணையை ஊற்றி உயிரோடு கொழுத்துகிறாள்.

என்ன கொடுமை. என்ன அக்கிரமம்.. 5 பவுன் நகைக்காக ஒரு கர்ப்பிணியை உயிரோடு கொழுத்திய மகாப்பாவி மாமியார் என்ற பெண்தானே. நடுவர் அவர்களே! ஒரு பானை சோற்றுக்கு ஒரு சோறு பதம் என்பார்கள். இதுபோல எத்தனையோ கொடுமைகள் பெண்களால்தான் நடந்துகொண்டிருக்கின்றன. அம்மா தாய்மாரே.. கொஞ்சம் அடக்கி வாசிங்க. ரொம்ப பேசினீங்கன்னா ஒரு பய கூட உங்கள கட்டமாட்டான்.

பெருமானார் (ஸல்) அவர்கள் கூறினார்கள்: அல்பின்து பரக்கத்துன்'' பெண் குழந்தை ஒரு பரக்கத்*தாகும் என்று. ஆனால் இன்று பெண்களே பெண்களை மதிப்பதில்லை. ஆண்குழந்தை பிறந்தால் ஆயிரம் ஆயிரம் ஆனந்தம் அளவிலா சந்தோஷம். முகமெல்லாம் சிரிப்பு. அதே நேரத்தில் பெண்குழந்தை பிறந்துவிட்டால் போதும் அந்த அம்மாவின் முகம் வாடி வதங்கி சுருங்கிப் போய்விடுகிறது. தலைமேல கைவச்சு உட்கார்ந்துடுவாங்க. பெண்களாகிய நீங்களே பெண்களை மதிப்பதில்லை. குற்றம் செய்வது நீங்கள்; பழி போடுவது எங்கள் மீதா? பாவம் ஒரு பக்கம் பழி ஒரு பக்கமா?

 இன்றைக்கு சமுதாயத்துல வரதட்சணை வாங்கமாட்டோம் என்று எல்லா ஆண்களும் சேர்ந்து முடிவெடுத்தாலும் இந்த வீணாப்போன பொம்பளைங்க விடமாட்டாங்க நடுவர் அவர்களே. எப்படி கேட்கிறீங்களா?

நான் இந்த மேடையிலே சவால் விடுறேன். நல்லா குறிச்சு வச்சிக்கிருங்க. நான் வரதட்சணை வாங்காம கல்யாணம் முடிக்க தயார். ஆனா இந்த சமுதாயம் என்ன சொல்லும் தெரியுமா? 'பொழைக்கத் தெரியாதவன்'.  குறிப்பா இந்த பொம்பளைங்க என்ன சொல்வாங்க தெரியுமா? ''அடியே.. மாப்பிள்ளைட்ட ஏதோ கொறை இருக்குடி.. அதேன் கைக்கூலி வேணாம்கிறார்''.

ஆக, திருந்த நினைக்கும் எங்களை திருந்தவிடாம தடுக்கிறது யாரு? பெண்கள்தான்! ஆகவே, வாட்டி வதைக்கும் வரதட்சணைக் கொடுமைக்கு பெரிதும் காரணம் பெண்களே பெண்களே என்று கூறி அமர்கிறேன்.

 -----------------------------------------------------------------------------------------------

 *பரக்கத்:அருள்வளம், பாக்கியம்.

வரதட்சணை

திருத்தப்படவேண்டிய திருமணச் சடங்குகள்-நாடகம்4

நாடகம் பகுதி-1 ஐ படிக்க இங்கே அழுத்தவும்

நாடகம் பகுதி-2 ஐ படிக்க இங்கே அழுத்தவும்

நாடகம் பகுதி-3 ஐ படிக்க இங்கே அழுத்தவும்

                                    காட்சி-7

பஷீர் பாய் சலீம் பாயின் பரிதாபமான நிலை கண்டு இறங்குகிறார் அவர் சலீமை சந்தித்து பேசுகிறார்:
''சலீம் பாய்.. இப்ப நடந்த எல்லாத்தையும் நான் பார்த்துட்டுதான் இருந்தேன். ஒரு சமுதாயத்துல ஒரு சிலர் செய்யிறத வச்சு ஒட்டுமொத்த சமுதாயத்தையும் தப்பா எடை போடக்கூடாது. உங்களுடைய மன உறுதியை நான் பாராட்டுறேன். உங்களுக்கு சம்மதம்னா உங்க பொண்ண எம் பையனுக்கு எடுத்துக்கிறேன். நயா பைசாக்கூட வேணாம். என்ன சொல்றீங்க?''

உன்மையாவா சொல்றீங்க?

''ஆமாங்க சலீம் பாய். மார்க்கமும் ஒழுக்கமும் உள்ள பொண்ணைத்தான் நான் தேடிக்கிட்டு இருந்தேன். உன்மையான வெற்றி அதுலதானே இருக்கு? நம்ம நபி (ஸல்) அவர்கள்கூட அழகாச் சொன்னாங்களே:

''பொதுவா பொண்ணு பார்க்குறவங்க பணத்தப் பார்த்து முடிக்கிறவங்களும் உண்டு; பரம்பரையப் பார்த்து முடிக்கிறவங்களும் உண்டு; அழகைப் பார்த்து முடிக்கிறவங்களும் உண்டு. ஆனாஒழுக்கத்தைப் பார்த்து முடிக்கிறவங்கதான் வெற்றி பெற முடியும் ''

அப்படின்னு சொன்னாங்க இல்லையா? அதனாலதான் உங்க பொண்ணை நான் தேர்ந்தெடுத்தேன். அதுமட்டுமில்ல.. புதுசா முஸ்லிமான உங்க குடும்பத்துல நான் பெண்ணெடுத்தா எனக்கு டபுள் நன்மை உண்டு. அது பெரும் பாக்கியம். அதனால கவலைப் படாதீங்க. எல்லாம் நல்லபடியா நடக்கும்.

''ரொம்ப நன்றிங்க.. அல்லாஹ் உங்களுக்கு நீண்ட ஆயுசப் போட்டு வப்பான்''

காட்சி-8
(பஷீரும் மகன் அப்துல்லாஹ்வும்):



மகனே அப்துல்லாஹ். இங்கே வாயேன் ஒரு நல்ல செய்தி.

என்ன வாப்பா சொல்லுங்க

மகனே உனக்கு ஒரு நல்ல இடத்துல பொண்ணு பார்த்திருக்கேன்

வாப்பா.. இப்ப எதுக்கு எனக்கு கல்யாணம்?

என்ன ராசா இப்படி சொல்லுற? உனக்கு 24 வயசாச்சு.மூன்றாம் எட்டில் முடிக்காதது திருமணம் அல்ல என்று முன்னோர்கள் சொல்லியிருக்காங்க. நீ சரின்னு சொன்னா மேற்கொண்டு காரியத்தப் பார்க்கலாம். என்ன சொல்ற?

வாப்பா.. உங்க பேச்சுக்கு எப்ப நான் மறுபேச்சு பேசியிருக்கேன்.  நீங்க செய்தா அது சரியாத்தான் இருக்கும். ஆனா ஒரு விஷயம். நான் யாரைக் கல்யாணம் செய்யணும்னு நீங்க முடிவு பண்ணின மாதிரி கல்யாணம் எப்படி நடக்கணும்னு நான் முடிவு பண்ணுறேன்.. ஓகேயா?

ஓகே. சொல்லு எப்படி நடக்கணும்?

என்னோட கல்யாணம் முழுக்க முழுக்க சுன்னத்தான முறைப்படி நடக்கணும். வெள்ளியிலே ஜும்ஆ பள்ளியிலே....

அப்படின்னா என்ன? கொஞ்சம் விளக்கமா சொல்லுவேன்

பல நபிமார்களுக்கும் நல்லோர்களுக்கும் கல்யாணம் நடந்த வெள்ளிக் கிழமையிலே என்னோட கல்யாணமும் நடக்கணும். பெரிய அலங்காரத் தோரணமோ ஆடம்பரமோ இல்லாம பள்ளியிலே எளிமையா நடக்கணும். பத்திரிக்கைக்கூட அடிக்க வேணாம் வாப்பா.

பத்திரிக்கை இல்லாம எப்படிப்பா?

சரி. சிம்பிளா அடிங்க. ஆனா அந்த பத்திரிக்கையில மொய் வாங்குவதில்லை என்பதை முக்கியமா காட்டிடுங்க. அப்புறம் சுன்னத்தான தப்ஸ் ஊர்வலம் இருந்தா நல்லது. மத்தளம் கொட்டு இல்லாம ஆட்டம் பாட்டம் இல்லாம தாரைத் தப்பட்டைகள் கிழிந்து தொங்காம குடி கும்மாளம் இல்லாம நல்ல முறையில இருக்கணும்.

சரி.. அப்புறம்?

முகத்தையே மறைக்கிற அளவுக்கு மாலை போடாம சிம்பிளா ஒரே ஒரு மாலை போதும். மாப்பிள்ளை என்பதற்கு ஒரு அடையாளமாகவும் நறுமணமாகவும் இருக்கும். அதுமட்டுமில்ல.. மலர்கள் இருக்கும் சபையில் மன இறுக்கம் மன அழுத்தம் ஏற்படாது என்பது மருத்துவம். அதனால ஒரு ஒரே ஒரு மாலை போதும்.


சரிப்பா.. வீடியோவுக்கு சொல்லிரவா?

வீடியோவா? அறவே வேண்டாம். ஃபோட்டோ எடுக்கிறதப் பத்திக்கூட யோசிக்கணும் வாப்பா. ஏன்னா ஃபோட்டோ எடுக்கிற சாக்குல ஜமாத்த காக்க வச்சிரக்கூடாது. அதனால நிறைய பேரோட பொன்னான நேரமும் வீணாகி வேலையும் கெட்டுப் போயிடும். நம்ம சக்திக்கு தக்கவாறு ஒரு சில ஆடுகளையாவது அறுத்து வலீமா விருந்து கொடுத்துறணும். அதுல ஏழைகளுக்கு முன்னுரிமை கொடுத்துறணும். ஏன்னா ஏழைகளை விட்டு விட்டு பணக்காரங்களை மட்டும் கூப்பிட்டு கொடுக்கிற விருந்து தரங்கெட்ட விருந்து அப்படின்னு நம்ம நபி (ஸல்) சொல்லியிருக்காங்க.

சரி மகனே. நான் போயி ஆட்டுக்கு அட்வான்ஸ் கொடுத்துட்டு வந்துர்றேன். இந்தா ஒரு 50,000 ஐ நீ வச்சிக்க.

50,000 மா? ஏன் வாப்பா எனக்கு அம்பதாயிரம்?

உனக்கில்லப்பா. உன்னோட ஃபிரண்ட்சுக்கு பார்ட்டி வைக்கணுமில்ல. அதுக்குத்தான்.

என்ன வாப்பா. நீங்களே இப்படி பேசலாமா?

அதில்லப்பா. எம் மகன் கல்யாணம். நிறைய பேர் வந்து வாழ்த்தணும்னு எனக்கு ஆசை இருக்காதா? இப்பவெல்லாம் 'தண்ணீ'  வாங்கிக் கொடுத்தானே கல்யாணத்துக்கு வர்றாங்க?

அதுக்காக..? அனாச்சாரத்தை செய்யமுடியுமா? நல்லா சொல்றேன் கேட்டுக்குங்க. 'தண்ணீ 'வாங்கிக் கொடுத்தான் கல்யாணத்துக்கு வருவாங்கன்னா அப்படி ஒரு நட்பே எனக்குத் தேவை இல்லை. அவங்க வந்து வாழ்த்தித்தான் நான் வாழணும்னு அவசியமில்லை.

வெரிகுட் வெரிகுட். எம்புள்ளன்னா எம்புள்ளதான். அப்பனுக்குப் புள்ள தப்பாம பொறந்துட்டடா!
                                                             ------------

காட்சி-9
 (சலீம் பாய்,  கரீம் பாய்)

''அஸ்ஸலாமு அலைக்கும் கரீம் பாய்''

''வ அலைக்குமுஸ் சலாம் சலீம் பாய் இப்ப என்ன விஷயமா வந்தீங்க? அதேன் அன்னைக்கே சொன்னேன்ல. நமக்குள் சம்பந்தம் இல்லைன்னு. இப்ப எந்த மூஞ்சிய வச்சிக்கிட்டு வந்தீங்க? நல்ல மாட்டுக்கு ஒரு சூடு போதாதா?''

கரீம் பாய்.. அவசரப்பட்டு வார்த்தைகளைக் கொட்ட வேண்டாம். எம் மக ஆயிஷாவுக்கு ஒரு நல்ல இடம் அமைஞ்சிருக்கு கைக்கூலி நயாப் பைசாக்கூட இல்ல அந்த கல்யாணத்துக்கு முதல் அழைப்பே உங்களுக்குத்தான். நீங்கதான் அதைத் தலைமை தாங்கி நடத்தி தரணும்.''

என்னது நானா? நிஜமாவா சொல்றீங்க?

ஆமா நிச்சயமா நீங்க கல்யாணத்துக்கு வரணும்.

ஆகா... சலீம் பாய் நீங்க நீங்கதான். என்ன பெருந்தன்மை உங்களுக்கு! உங்களை எப்படியெல்லாம் ஒதுக்கினேன்? நீங்க எவ்வளவு தூரம் என்னை மதிக்கிறீங்க?!

கரீம் பாய்.. என்னதான் இருந்தாலும் நீங்க எனக்கு வழிகாட்டி இல்லையா? நான் நரகத்தின் படுகுழியில் கிடந்தேன்; நீங்கதான் கைகொடுத்து கலிமா சொல்லிக் கொடுத்து சொர்க்கத்திற்கு சொந்தக்காரனாக மாத்துனீங்க. அதனால இந்த கல்யாணம் உங்க துஆவுலதான் நடக்கணும்.

''இன்ஷா அல்லாஹ் கண்டிப்பா வர்றேன்.''

அல்லாஹ்வின் கிருபையால் சலீமின் இல்லத் திருமணம் கரீம் பாய் தலைமையில் ஜமாத்தார்கள் புடைசூழ இனிதே நடந்தது..

மிக எளிமையாக!

வாங்க வாசகர்களே! நாமும் அந்த முன்மாதிரி திருமணத்தை வாழ்த்திட்டு 'வலீமா' விருந்தை ஒரு பிடி பிடிச்சிட்டு வருவோம்.

திருத்தப்பட வேண்டிய திருமணச் சடங்குகள்- நாடகம்3

  நாடகம் பகுதி-1 ஐ படிக்க இங்கே அழுத்தவும் 
  நாடகம் பகுதி-2 ஐ படிக்க இங்கே அழுத்தவும்   

                                        காட்சி-5

            (தரகரும், சலீமும் )


என்ன சலீம் பாய். நல்லா இருந்த நீங்க ரொம்ப டல்லா ஆயிட்டீங்களே என்ன விஷயம்?

அத ஏம்பா கேக்குறே. இந்த பொம்பளப் புள்ளகளைப் பெத்துட்டு வயித்துல நெருப்பக் கட்டிக்கிட்டு வாழவேண்டியதாயிருக்கு. அதுகள ஒரு நல்ல இடத்துல கட்டிக்கொடுக்கிறவரை நிம்மதியே இல்லப்பா.

ப்பூ.. இவ்வளவுதானா விஷயம். கவலையை விடுங்க; கண்ணீரைத் தொடைங்க. ஒங்க பொண்ணுக்கு பொருத்தமான எடத்த நான் காட்டுறேன். ஆனா என்ன கொஞ்சம் செலவாகும்.

எவ்வளவு செலவாகும்?

சும்மா ஒரு 2 லட்சமும் 20 பவுனும்

என்னது.. 2 லட்சமும் 20 பவுனா?

இப்படி வாயைப் பொளந்தா எப்படி கொமர கரையேத்துறது? நீங்க ஒன்னும் கவலப்படாதீங்க. நம்ம துரை இருக்கிறாரே. எவ்வளவு கேட்டாலும் தருவாரு. அவர்கிட்ட வட்டிக்கு வாங்கி காரியத்த கச்சிதமா முடிச்சிரலாம்.

என்னது.. வட்டிக்கு வாங்கியா? அவன்கிட்ட வட்டிக்கு வாங்குறதும் ஒன்னுதான்; என் குமரை வெட்டிப் பொதைக்குறதும் ஒன்னுதான். அவன்கிட்ட வட்டிக்கு வாங்கி என் காரியத்த நான் முடிச்சிருவேன்..நாளைக்கு அவன் வந்து ஊரைக் கிழிக்கவா? அதனால அந்த பேச்சே வேணாம்.

சரி அப்படின்னா பணத்துக்கு என்ன பண்ணப் போறீங்க?

ஏதோ தோது பண்ணுறேன்.. நீங்க ஆகவேண்டிய வேலையப் பாருங்க''

தரகர் செல்கிறார்.

(சலீம் பாய் தனக்குள்):
''பணத்துக்கு என்ன செய்யலாம்.. ஆங்.. ஜமாத்துல போய் உதவி கேட்டுப் பார்ப்போம்''


 (சலீம் பாய் ஜமாத் நிர்வாகியைச் சந்தித்து...):

அஸ் ஸலாமு அலைக்கும்.

வ அலைக்குமுஸ் ஸலாம் வாங்க சலீம் பாய் என்ன விஷயம்?

ஒன்னுமில்ல.. ஒரு சின்ன உதவி

என்ன சம்பளத்த கூட்டணுமா?

அதெல்லாம் ஒன்னுமில்ல. எம் மகள் ஆயிஷாவுக்கு ஒரு நல்ல மாப்பிள்ளை பார்த்திருக்கேன். அடுத்த வாரம் கல்யாணம். எல்லாம் சேர்த்து ஒரு 7 லட்சம் செலவாகும். ஜமாத்திலிருந்து ஏதாவது உதவி செய்வீங்கன்னு வந்தேன்

சலீம் பாய்.. ஜமாத்திலிருந்து பெரிய உதவியெல்லாம் செய்ய முடியாது. வேணுமின்னா லட்டர் தாறோம். மக்கள்ட்ட கேட்டுப் பாருங்க; அப்படியே பக்கத்து ஊரு ஜும்ஆ வசூலையும் பாருங்க. இந்தாங்க லட்டர்.

லட்டரை கையில் வாங்கிக் கொண்டு கவலையுடன் சலீம் பாய்):
''ச்சே.. என்ன இது யாருட்டயும் கையேந்தாம எவ்வளவு கவுரமா வாழ்ந்துக்கிட்டு இருந்தேன். இந்த சமுதாயம் என்னை பிச்சை எடுக்க வச்சிருச்சே. சரி என்ன செய்வது. குமருகளைப் பெத்தாச்சு. எல்லாம் பட்டுத்தான் ஆகனும்''

(மக்களை நோக்கி சலீம் பாய் ):
''மக்களே! நான் ஒரு நவ் முஸ்லிம். இரண்டு குமர்களை வச்சிக்கிட்டு சிரமப் படுகின்றேன். உங்களின் உதவியை நாடி வந்திருக்கின்றேன். அல்லாஹ்வுக்காக தாராளமாக உதவி செய்யுங்கள்''

கூட்டத்திலிருந்து ஒரு குரல்:
''ஆமாடா. கிளம்பி வந்துட்டாங்கே. இவனுகளுக்கு இதே பொழப்பாப் போச்சு. வாரம் வாரம் வந்துர்றாங்கே. இதுக்குத்தான் பள்ளிக்கு வரவே பயமா இருக்கு வந்தா பாக்கெட்டுல இருக்குற பத்து ரூபாயையும் அப்பிக்கிட்டு வுட்டுர்றாங்கெ
யா அல்லாஹ் என்ன இது? குமரையும்கொடுத்துட்டு கேவலத்தையும் கொடுக்குறீயே.. இது நியாயமா? மரத்த வச்சவன் தண்ணி ஊத்துவான்னு சொல்லுவாங்களே.. இங்கே தண்ணீரைக் காணோமே. கண்ணீருதானே வருது?
(சலீம் பாய்  தாங்கமுடியாத சோகத்துடன் பாடல்  படித்துக் கொண்டே நடக்கிறார்:

யா அல்லாஹு.. அருட்கொடையாளனே..
துன்பங்கள் போக்கும் பேருபகாரனே
எங்கள் திருமணத்தின் துன்பச் சுமை தீராதா -அதனால் 
விளைந்த கொடுமைகளோ மாறாதா.. யா அல்லாஹ்!


பள்ளிவாசல் தோறும் தொடரும் குமருக்கான பிச்சைகள்
தன்மானம் இழந்தழுகும் பெண்ணைப் பெற்ற நெஞ்சங்கள்
திருமண சந்தையிலே மாப்பிள்ளைக்குப் பேரங்கள் 
கருவே கல்லறையாய் பெண்குழந்தை சிசுவுகள்
புதிதாய் மார்க்கம் வந்த புது முஸ்லிம் குடும்பங்கள் 
திருமணச் சுமையாலே மதம் மாறும் அவலங்கள் 
கருணை தயாளனே இது என்ன கொடுமைகள்
பரக்கத்தை தடை செய்யும் முசீபத்தின் அவலங்கள்


                                                     (எங்கள் திருமணத்தின்)


கஞ்சனும் காசை அள்ளி வீச வைக்கும் கல்யாணம்
வட்டிக் கடன் பட்டு சொத்தை விற்க வைக்கும் கல்யாணம் 
சமூகத்தின் பொருள்வளத்தை நாசமாக்கும் கல்யாணம்
தீமைக்கு தீமையாகி விளைந்து நிற்கும் கல்யாணம் 
வீண்விரைய செலவில் இறை சாபம் தேடும் கல்யாணம்
கவுரவம் தற்பெருமை காட்ட நடக்கும் கல்யாணம் 
என்றுதான் தீருமோ இந்தபெரும் அலங்கோலம் 
என்றுதான் தீருமோ இந்தபெரும் அலங்கோலம் 


                                                    (எங்கள் திருமணத்தின்)


சொர்க்கத்து பந்தமாகும் திருமணத்தின் உறவுக்கு
நரகத்து வேதனையாய் சுட்டெரிக்கும் செலவுகள்
மருந்துண்ண வைக்குகின்ற விருந்து முறைகேடுகள்
கைக்கூலிக்கு கமிஷன் வாங்கும் கல்யாணத்து தரகர்கள்
எளிமைத் திருமணங்கள் 'மஹர்' கொடுத்து நடக்கணும்
இது ஒரு வணக்கம் என்ற உண்மைதனை உணரணும் 
வேதனைத் தீயில் வாடும் பெண்ணினத்தைக் காக்கணும் மார்க்கமும் மனசாட்சியும் இனியாவது ஜெயிக்கணும்
                                                    (எங்கள் திருமணத்தின்)

காட்சி-6

சலீமின் சகோதரி மகன் கோபால் சலீமை நையாண்டி செய்கிறான்:)

மாமா. என்ன மாமா புலம்பிக்கிட்டு இருக்கீங்க. இப்ப பொலம்பி என்ன செய்ய? இதெல்லாம் மதம் மாறுவதற்கு முன்னாடியே யோசிச்சிருக்கணும். அந்த சமுதாயத்துலதான் வரதட்சணைக் கொடுமை அதிகமா இருக்குன்னு தெரியாதா? இப்பவும் ஒன்னும் கெட்டுப் போகல. நீங்க 'உம்' என்று ஒரு வார்த்தை சொல்லுங்க. ஆயிஷாவுக்கு நான் வாழ்க்கை கொடுக்கிறேன். மாமா என்னதான் இருந்தாலும் நான் உங்க முறைமாப்பிள்ளை இல்லையா. அந்த உரிமையிலதான் கேட்கிறேன். ஆயிஷாவை எங்கிட்ட விட்டுருங்க.அஞ்சு பைசா கூட வேணாம். என்ன சொல்றீங்க?

''டே கோபாலு. வார்த்தயை அடக்கிப் பேசு. எங்கிட்ட சன்மானம் இல்லாம இருக்கலாம்; ஆனா தன்மானம் நிறைய இருக்கு. எங்கிட்ட வசதி இல்லாம இருக்கலாம்; ஆனா உறுதியான ஈமான் இருக்கு. இன்னொரு தடவை இப்படி வந்து கேட்டே.. சொந்தக்காரன்னு கூட பார்க்கமாட்டேன்; வெட்டிப் பொதச்சிருவேன்.

''அட போய்யா.. நல்லதுக்கு காலமில்லே''

கோபால் ஓடிவிடுகிறான்.

''யா அல்லாஹ். என்ன ஒரு சோதனை? என் ஈமானுக்கே ஆபத்தா? இதுக்கு வேற வழியே இல்லையா?''

                     நாடகம் பகுதி-4 ஐ படிக்க இங்கே அழுத்தவும்

திருத்தப்பட வேண்டிய திருமணச் சடங்குகள்- நாடகம்2

 நாடகம் பகுதி-1 ஐ படிக்க இங்கே அழுத்தவும்                                      

    காட்சி-3             

(கரீம், சலீம், ஜமாஅத் தலைவர் மற்றும் நிர்வாகி)

கரீம்:

''அஸ் ஸலாமு அலைக்கும் தலைவரே

வ அலைக்குமுஸ் ஸலாம்; வாங்க கரீம் பாய். இது யாரு புதுசா இருக்கு?

நம்ம சரவனன்தான் கலிமா சொல்லிட்டாரு.

யாரு.... நம்ம சரவணனா? சுப்ஹானல்லாஹ்! முகத்துல என்ன ஒரு தெளிவு.. என்ன ஒரு பொழிவு? சரி என்ன விஷயமா வந்தீக?

ஒன்னுமில்ல.. இவருக்கு ஹிதாயத் கிடைச்சிருச்சு. அதுபோல ஒரு வேலையும் கிடைச்சிருச்சுன்னா சந்தோஷமா இருப்பாரு; பாவம் கஷ்டப் படுராரு.

 தலைவர்:

கரீம் பாய்.. கஷ்டப்படுறவங்களுக்கும் கடன்படுறவங்களுக்கும் உதவி செய்யத்தானே நம்ம பைத்துல்மால் வச்சிருக்கோம் நம் ஊரில் இருக்கும் செல்வந்தர்களெல்லாம் வருடத்திற்கு ஒரு முறை அவர்களுடைய ஜகாத் பணத்தையெல்லாம் கணக்கிட்டு நம்ம பைத்துல்மாலில் கொண்டுவந்து கொடுத்துடுவாங்க. நாம அதை என்ன செய்கிறோம்? இந்த மாதிரி புதுசா முஸ்லிமானவங்க, கஷ்டப்படுறவங்க, கடன் தொல்லையால் அவதிப்படுறவங்க, பெண்குமர்களை வச்சிக்கிட்டு பேந்த பேந்த முழிக்கிறவங்க, பிள்ளைகளைப் படிக்க வைக்க பணம் இல்லாதவங்க இவங்களைத் தேடிப்போயி உதவி செய்கிறோம். அதனால கண்டிப்பா உங்களுக்கு உதவி செய்வோம்.

 நிர்வாகி:

ஆமாம். உங்களுக்கு எத்தனை பிள்ளைகள்?

 சலீம்:

2 பரக்கத்து 2 ஹரக்கத்து.

''அப்படின்னா?''

''2 பொம்பளப் புள்ள 2 ஆம்பளப் புள்ள.''

''ஆஹா..  பொம்பளப் புள்ளயை பரக்கத்துன்னு சொன்னீங்க பார்த்தீங்களா? வெரிகுட். அல்லாஹ் உங்கள கைவிடமாட்டான். உங்க 2 பொம்பளப் புள்ளகளையும் நம்ம நிஸ்வான் மதரசாவுல சேர்த்துடுங்க; ஹிதாயத்துன்- நிஸ்வான்.. நிச்சயமா ஹிதாயத் கிடைக்கும். 2 ஆம்பளப் புள்ளைகளுக்கும் சுன்னத் வைக்கனுமில்லையா? கவலைப் படாதீங்க. நம்ம ஊருல வாலிபர்கள் சிலர் ஏழைகளுக்கு இலவசமாக சுன்னத் வைக்கிறாங்க. அது மட்டுமில்ல.. நம்ம வாலிபர் சங்கம் பெரு நாள் அன்னக்கி அரிசிகளையும் ஆடைகளையும் உங்க வீட்டுக்கு வந்தே கொடுத்திடுவாங்க. உங்களை ஆதரிக்க இத்தனை கைகள் இருக்கும்போது நீங்க ஏன் கவலைப் படவேண்டும்? உங்க நிரந்தர வேலைக்காக ஒரு ஏற்பாடு செய்கிறோம். இன்ஷா அல்லாஹ் இன்னையிலிருந்து நீங்கதான் நம்ம பள்ளியில முஅத்தின். சம்பளம் 5000. சம்மதமா?

 சலீம்:

ரொம்ப நன்றி தலைவரே.. ஜஸாக்கல்லாஹ்.

                   (திரை மூடித் திறக்கிறது)

                                                        காட்சி- 4           

                                       

(சில வருடங்களுக்கு பிறகு. கரீமும்  சலீமும் சந்தித்துக் கொள்கின்றனர்

வாங்க சலீம் பாய். என்ன இந்த பக்கம்?

ஒன்னுமில்ல.. எம் மூத்த மக ஆயிஷா ஆலிமா பட்டம் வாங்கிருச்சு; ஆளாகி 5 வருஷமாச்சு; அதை ஒரு நல்ல இடத்துல கட்டிக்கொடுக்கணுமில்லையா?

ஆமா கண்டிப்பா செய்யணும். வாங்க உட்கார்ந்து பேசுவோம். அம்மா பாத்திமா.. நம்ம சலீம் பாய் வந்திருக்காக. சூடா ரெண்டு காப்பி கொண்டு வாம்மா. ம்.. நீங்க சொல்லுங்க

அதான் கரீம் பாய்.. நான் என்ன சொல்றேன்னா.. நம்ம ஆயிஷா அழகுலயும் கொறச்சலில்ல; அறிவுலயும் கொறச்சலில்ல; ஒழுக்கம்னா ஒழுக்கம் அப்படி ஒரு ஒழுக்கம். அதனால?

அதனால?!

அதனால உங்க மகனுக்கே ஆயிஷாவை நிச்சயம் பண்ணிரலாம்னு இருக்கேன். நீங்க சரின்னு சொன்னா..

என்னது.. எம் மகனுக்கு உம் மகளா? என் வீட்டுல நீ சம்பந்தம் பண்ணுறதா? முதல்ல எடத்த காலி பண்ணு

நான் என்ன சொல்றேன்னா...

நீ ஒன்னும் சொல்லவேணாம்; இருக்க இடம் கொடுத்தா படுக்க பாய் கேட்குதா? கெட் அவுட்.

என்ன கரீம் பாய் இப்படி ஆத்திரப் படுறீங்க? கலிமா சொல்லிட்டா எல்லாருமே சமம்னு நீங்க சொல்லலையா?

பாகுபாடு பார்க்கக்கூடாதுன்னு பல தடவை உங்க வாயாலேயே சொல்லலையா?

சொன்னேன்; அதுக்காக சம்பந்தம் பண்ணமுடியுமா? எம் பொண்டாட்டி செருப்பாலேயே அடிப்பா.

அப்படியா பாகுபாடு பார்த்தா அல்லாஹ் நெருப்பாலேயே அடிப்பானே. அப்ப என்ன செய்வீங்க?

''யோவ் ரொம்ப பேசாதே. முதல்ல எடத்த காலி பண்ணுய்யா.. சம்பந்தமாம் சம்பந்தம்.. யாருக்கிட்ட யாரு சம்பந்தம் பண்ணுறது.''

(வெளியேறுகிறார். கவலையுடன் நடக்கிறார்.)

'ச்சே.. கரீம் பாய் இப்படி பேசிட்டாரே. என்ன பண்ணுறது? ம்.. வேற ஏதாவது விசாரிச்சுப் பார்ப்போம். ஒரு நல்ல இடம் கிடைக்காமலா போயிடும்?'

பாடல் ஒலிக்கிறது:

'' ஒரு கதவை மூடிவிட்டால் பல வழியைத் திறந்து வைப்பான்; உண்மை பேசும் மானிடர்க்கே உறுதுணையாய் அவன் இருப்பான்''

  பாடல் மனதுக்கு ஆறுதலாய் இருந்தது.

•  நாடகம் பகுதி-3 ஐ படிக்க இங்கே அழுத்தவும்
• 
  
• நாடகம் பகுதி-4 ஐ படிக்க இங்கே அழுத்தவும்

திருத்தப்படவேண்டிய திருமணச் சடங்குகள்-நாடகம்1

''அய்யா தரகரே.. இங்கே வாங்க எம் பையன் பாஷாவுக்கு ஒரு நல்ல பொண்ணா பாருங்க!''

''அப்படியா உங்க பையன் என்ன செய்கிறார்?''

''என்னய்யா இப்புடபொசுக்குன்னு கேட்டுப்புட்டே. எம்பையன் ஒரு பெரிய  வி.ஐ.பி ய்யா!''

''வி.ஐ.பி.ன்னா?''

''V...I...P... வேலை இல்லா பட்டதாரி''
.

''அடத்தூ..வெட்டியா சுத்திக்கிட்டு இருக்கான்னு சொல்லுங்க''

''அட ஆமாய்யா. யோவ் தரகரே எம் பையனுக்கு நீ பாக்குற எடம் பெரிய எடமா இருக்கணும்''

''பெரிய எடம்னா நம்ம பள்ளிக் கூடத்துக்கு பக்கத்துல குப்பைக் கொட்டுற இடம் இருக்கே அது போதுமா?''

''யோவ் அதில்லைய்யா. பெரிய எடம்னா பசையுள்ள பார்ட்டி.''

''ஓ பசையுள்ள பார்ட்டியா?''

''அதேதான். இப்பவாவது புரிஞ்சிட்டியே போ.. போய் பார்த்துட்டு வா!''

(தரகர் தனக்குள் சொல்லிக் கொள்கிறார்):

'பசையுள்ள பார்ட்டிய எங்கே போய் தேடுறது..

ஆங். அந்தா இருக்கார் பசையுள்ள பார்ட்டி.'
 (பக்கத்தில் போஸ்டர் ஒட்டிக்கொண்டிருந்தவனை இழுத்து வருகிறார்)

''யோவ் என்னைய்யா போஸ்டர் ஒட்டுறவன இழுத்துக்கிட்டு வாறே?''

''நீங்கதான் பாய் கேட்டீங்க.. பசையுள்ள பார்ட்டின்னு. அதான்!''

''அய்யோ உன்னோட பெரிய வம்பாப் போச்சுய்யா. போயி நல்லா பணக்கார இடமாப் பார்த்துட்டு வா, போ!''

''சரிங்க பாய்.''

சிறிது நேரம் கழித்து திரும்பி வந்து )

''பாய்.. ஒரு பெரிய இடம் சிக்கியிருக்கு. அந்த ஆளுக்கு 2 பொண்ணு. பெரிய பொண்ணு கொஞ்சம் கருப்பாத்தான் இருக்கும்.. ஆனா 2 லட்சம் தர்ராங்களாம். அடுத்த பொண்ணு அதைவிட கருப்பா இருக்கும். ஆனா 5 லட்சம் தர்ராங்களாம்.. நான் எதைப் பார்க்கட்டும்?''

''அப்படின்னா அதைவிட இன்னும் கருப்பா பாரு!''

''அடத்தூ.. நீயெல்லாம் ஒரு மனுஷனா?''

''சரி சரி. கோவிச்சுக்காதேய்யா. ரொம்ப வேணாம். ஒரு 2 லட்சம் 20 பவுன் சிம்பிளா ஒரு இடம் பாருய்யா.''

''இது ஒனக்கு சிம்பிளா? 2 லட்சம் 20 பவுன் என்பது உனக்கு சிம்பிளா?''

''யோவ்.மொறப்படிப் பார்த்தா நான் 10 லட்சம் கேட்கணும். ஏதோ போனாப் போகட்டும்னு 2லட்சம் கேக்குறேன்.''

''என்னது 10 லட்சமா? எப்படி?''

''ஆமாய்யா. எம் பையனை பெத்து வளத்து ஆளாக்கியிருக்கேன்ல..அதுக்கு ஒரு 7 லட்சத்த போடு. படிக்க வச்சு பட்டதாரி ஆக்கியிருக்கேன்ல.. அதுக்கு ஒரு 2 லட்சத்த போடு. நாளைக்கு அவனுக்கு கல்யாணம்னா விருந்து வைக்கனும், குரூப்புக்காரனுக்கு பார்ட்டி வைக்கனும்.. அதுக்கு ஒரு 1 லட்சத்த போடு. ஆக கொறஞ்சது 10 லட்சம் கேட்கணும். ஏதோ போனாப் போகட்டும்னு 2லட்சம் கேக்குறேன்.''

''ஏன்யா. இதெல்லாம் ஒரு பெத்த பிள்ளைக்கு தகப்பன் செய்யவேண்டிய கடமை. கடமைக்குப் போய் கணக்கு பாக்குறீயே, இது நியாயமா?''

''யோவ். நியாயம் அநியாயமெல்லாம் இருக்கட்டும், சொன்ன வேலையை செய்யா! கமிஷன் தர்றேன்.''

''கமிஷனா.. அப்ப ஓகே!''
                                     (திரை மூடித் திறக்கிறது)

                                       காட்சி-2 

சரவணன் உள்ளிட்ட மக்கள் கூட்டத்தில் கரீம் பாய் இஸ்லாமை எடுத்துச் சொல்கிறார் :

ஒன்றே குலம் என்று பாடுவோம் ஒருவனே தேவன் என்று போற்றுவோம்

ஒன்றே குலம் ஒருவனே தேவன் மக்களே! நாம் அனைவரும் சகோதரர்கள். ஆதம் ஹவ்வா என்ற ஒரு தாயின் மக்கள் நமக்குள் குலத்தாலோ நிறத்தாலோ ஏற்ற தாழ்வுகள் இல்லை.
 நாம் அனைவரும் ஒரே இறைவனின் படைப்புகள். அந்த இறைவனுக்கு முன்னால் அரசன் ஆண்டி ஏழை பணக்காரன் உயர்ந்தவன் தாழ்ந்தவன் எல்லோரும் சமமே!
சரவணன் :

ஐய்யா. இந்த சமவுரிமைக்காகத்தானே நாங்க ஏங்குறோம். எங்கள ஒரு மனுஷனாவே மதிக்கமாட்டேங்குறாங்கய்யா. நாங்க தொட்டா தீட்டு; பட்டா தீட்டுங்குறாங்க. உயர்ஜாதி குடியிருக்கும் தெருவுல நாங்க நடக்கக்கூட உரிமை இல்லய்யா. நடந்தா கால வெட்டுறாங்க தட்டிக்கேட்டா கழுத்த வெட்டுறாங்க. இதுக்கெல்லாம் ஒரு முடிவே இல்லையாங்க?
கரீம் பாய் :

தம்பி..  நம்ம நாட்டுல எத்தனையோ நல்லவங்க வந்து நச்சுன்னு மண்டையிலே ஒரைக்கிற மாதிரி நல்லாத்தான் சொல்லிட்டுப் போனாங்க. சாதிகள் இல்லையடி பாப்பா அப்படின்னு பாரதியார் பளிச்சின்னு சொன்னார். தீண்டாமை ஒரு பாவச்செயல் அப்படின்னு நாட்டுத் தந்தை நல்லா சொன்னாரு. சொல்லி என்ன செய்ய? இன்னமும் இந்த நாட்டுல பல கிராமங்கள்ல தீண்டாமைக் கொடுமை தலைவிரிச்சுத்தானே ஆடுது? பல டீக்கடைகள்ல இரண்டு டம்ளர் முறை இன்னும் இருக்கத்தானேசெய்யுது? மேல்ஜாதிக்கு ஒன்னு கீழ் ஜாதிக்கு ஒன்னுன்னு.
சரவணன் :

ஏம் பாய்.. இதுக்கெல்லாம் ஒரு விடிவே இல்லையா?
கரீம் பாய் :

ஏன் இல்லை? பெரியார் முதல் பெரியார்தாசன் வரை சொன்ன ஒரே தீர்வு என்ன தெரியுமா? இன இழிவு ஒழிய இனிய மருந்து இஸ்லாம் ஒன்றுதான். எந்த சாதியா இருந்தாலும் கலிமா சொன்ன மறு நிமிடமே கண்ணியம் வந்துடும்; மரியாதை கூடிடும்; நீயும் மானமுள்ள ஒரு மனுஷனா தலை நிமிர்ந்து வாழலாம்
சரவணன் :

அப்படியா பாய்! அப்படின்னா இப்பவே சொல்றேன் அஷ்ஹது அல்லாயிலாஹ இல்லல்லாஹ் வ அஷ்ஹது அன்ன முஹம்மதர் ரசூலுல்லாஹ்.

கரீம் பாய் :

ரொம்ப சந்தோஷம்.. ரொம்ப சந்தோஷம்.!
சரவணன் :

கரீம் பாய்.. எனக்கு கிடைத்த இந்த ஹிதாயத் என் மனைவி மக்களுக்கும் கிடைக்கனும். அவங்களும் நரகத்தை விட்டும் விடுதலையாகனும்.
கரீம் பாய் :

நிச்சயமா. அல்லாஹ் உங்களுக்கு துணை இருப்பான்; போய் உங்க குடும்பத்துக்கும் கலிமா சொல்லிக் கொடுங்க.. போங்க.''

சரவணன் சலீமாக மாறிய சந்தோஷத்துடன் வீடு சென்றார்.

(அடுத்த நாள்....

சலீமும் கரீமும் மீண்டும் சந்திக்கின்றனர்)

''அஸ் ஸலாமு அலைக்கும் கரீம் பாய், எப்படி இருக்கீங்க?

வ அலைக்குமுஸ் ஸலாம் சலீம் பாய், அல்லாஹ்வுடைய கிருபையிலே நல்லா இருக்கேன். அது சரி எங்கே கிளம்பிட்டீங்க?

தொழுகத்தான்.. பள்ளிக்குப் போய்க்கிட்டு இருக்கேன். பாங்கு சொல்ல பத்து நிமிஷந்தானே இருக்கு? முன்கூட்டியே பள்ளிக்குப் போய் உளூ செய்துட்டு உட்காருவது நல்லதுதானே கரீம் பாய்?

அடடா சுப்ஹானல்லாஹ். பரம்பரை முஸ்லிம்கிட்டயே இந்த பழக்கம் இல்லையே? நேத்துத்தான் கலிமா சொன்னீங்க? இன்னிக்கே இவ்வளவு ஈமானா? மாஷா அல்லாஹ். சரி வாங்க நாம ரெண்டு பேரும் சேர்ந்தே போகலாம்.

(பள்ளிக்குள் நுழைகின்றனர்)

''சரி பள்ளிக்குள் வந்தாச்சு.. வாங்க முன் சஃப்புக்கு போயிரலாம்''

''முன் சஃப்புகா? நானா?''

''ஏங்க சலீம் யோசிக்கிறீங்க? எப்ப கலிமா சொன்னீங்களோ அப்பவே உங்களுடைய பழைய அடையாளமெல்லாம் போயிருச்சு. இப்ப நீங்க ஒரு உயர்ந்த முஸ்லிம்; நீங்க விரும்பினா முதல் வரிசையில மட்டுமல்ல அதுக்கு மேலே இமாமாக கூட நிக்கலாம்''

''என்னது இமாமாவா?''

''ஆமாம் முறைப்படி ஓதிப் படிச்சிட்டு இப்பவே நீங்க இமாமா கூட இருந்து எங்களுக்கு வழிகாட்டலாம். நான் ஏற்கனவே சொல்லலையா? அல்லாஹ்வுக்கு முன்னாடி அரசனும் ஆண்டியும் சமம்னு.''

சலீம் தொழுதுவிட்டு இறைவனிடம் இறைஞ்சுகிறார்:

''யா அல்லாஹ்.. சாக்கடையை விட்டுட்டு சத்தியத்திற்கு வந்துட்டேன்; உனது உண்மையான மார்க்கத்தை ஒப்புக்கொண்டு விட்டேன்.எனது உறவினர் என்னை உதறிவிட்டனர்.எனது பங்காளிகள்கூட என்னைப் பகைத்துவிட்டனர். இப்பொழுது முழுமையாக உம்மேல தவக்குல் வச்சிருக்கேன். நீதான் கடைசி வரைக்கும் என்னைக் காப்பாத்தனும். ஆமீன்.''
கரீம் பாய் :

ஆமீன்; ஆமீன்; யாரப்பல் ஆலமீன். கவலைப் படாதீங்க சலீம் பாய். உங்களுக்கு உற்ற துணையா நாங்க இருக்கோம். கூடிய விரைவில் உங்களுக்கு ஒரு வேலைக்கு ஏற்பாடு செய்கிறேன்; வாங்க நம்ம தலைவரைப் போய் சந்திப்போம்.

• நாடகம் பகுதி-2 ஐப் படிக்க இங்கே அழுத்தவும்
• 
  
• நாடகம் பகுதி-3ஐப் படிக்க இங்கே அழுத்தவும்
• 
  
• நாடகம் பகுதி-4 ஐப் படிக்க இங்கே அழுத்தவும்